Duglegu yndislegu sjálfboðaliðarnir í fyrra!

Skilaboð frá Rokkstjóra:

Eins og þið vitið öll þá er ekki möguleiki að framkvæma Aldrei fór ég suður án þess að fá dygga aðstoð sjálfboðaliða. Núna erum við komin á fullt í að undirbúa næstu hátíð og erum við farin að leita eftir góðu og duglegu fólki til að taka þátt í undirbúningi og framkvæmd hátíðarinnar.

Ef þú hefur áhuga á því að taka þátt og hjálpa þá vinsamlegast sendu mér tölvupóst á rokkstjori@aldrei.is og við munum svo vera í sambandi við þig þegar nær dregur!

Okkur vantar aðstoð við eftirtalda hluti:

Bruch á heimavistinni fyrir tónlistarfólkið.

 
Þær Nanný og Ásgerður ætla að taka að sér að skipuleggja þetta og vantar þeim 6 manns til að hjálpa til við matreiðslu hvorn daginn - alls 12 sjálboðarliða.

Heimavistin

 
Hún Dóra Norðdahl ætlar að stýra teyminu sem gerir heimavistina klára á miðvikudeginum fyrir páska. Hana vantar með sér ca 6 manns og tekur þetta rúman klukkutíma.
Svo vantar okkur ca 10 manns í frágang á mánudeginum, taka af rúmum og koma dýnum aftur í geymslu.

Tónleikastaðurinn

Okkur vantar fólk til að undirbúa og taka saman á tónleikastaðnum. Þarna er verið að smíða, setja upp tjöld og þessháttar. Okkur vantar 6 manns í undirbúninginn og 10 manns í fráganginn á sunnudeginum.

Salernismál

Bæði föstudags- og laugardagskvöldin vantar okkur fólk til að fylgjast með að allt sé í lagi á salernasvæðinu. Hugmyndin okkar var að skipta þessu í ca klukkutíma vaktir og viðkomandi fylgist með því hvort að það vanti klósettpappír og þessháttar. Guðfinna Hreiðars mun vera með yfirumsjón með klósettmálunum.

Það er okkur mikils virði að fá þína aðstoð og erum við því mjög spennt að fá að heyra frá ykkur!

Bestu kveðjur
Jón Þór Rokkstjóri

Í sandblásinni eyðimörk á norðurhjara Afríku skríður úlfaldalest hægt og bítandi yfir sandöldurnar eins og langferðabíll á leið yfir Þorskafjarðarheiðina sálugu.  Sólin skín miskunnarlaust á túrbanvafin höfuð ferðalanganna og hitinn slær þá bylmingshöggum líkt og þrælahaldararnir börðu þræla sína án afláts forðum.  
En hvað er það sem fær menn til að fórna svalri golunni og köldum þægindum fyrir tilbreytingalausa eyðimerkursvækjuna? Jú samkvæmt ævagamalli goðsögn þá er í miðri eyðimörkinni að finna sígrænan sælureit, og í þessari eilífðar vin, standa soldánar sveiflunnar á hverju ári fyrir trylltri tónlistarhátið, þar sem 1001 ævintýri kemur saman og dansar fram á rauða nótt.
Þeir fundu hinsvegar aldrei þessa tónlistarhátíð, enda ekki til, aðeins skálduð upp af örvæntingafullum úlfaldasölumanni sem var ólmur í að selja síðustu skepnurnar.  Vesturlandabúarnir auðtrúu enduðu sína daga grafnir í stærsta sandkassa jarðar.  Úlfaldasölumaðurinn knái lét hinsvegar gamlan draum rætast,  notaði nýfengnu díneurnar sínar í flugmiða frá Alsír til Ísafjarðar, og að loknu 12 tíma flugi skellti hann sér beinustu leið á hina einu, sönnu, goðsagna kenndu tónlistarhátíð, Aldrei fór ég suður.  
Á meðann hann dvaldi í faðmi fjallra blárra varð hann svo “innspíraður” af hinum íslenska reddum essu anda að þegar hann kom til heimalands síns(klæddur í lopapeysu með barðastóran hatt á höfði) fylgdi hann hinu vestfirska fordæmi og stofnaði hina árlegu أنا لم يذهب الجنوب. tónlistarhátð.  Sem því miður hvarf í sandskafl með öllum sínum gestum fyrsta árið, og hefur ekki sést síðan.  Ahmed Basma tókst þrátt fyrir það á sínum stutta starfsferli sem skemmtikraftur að  verða vinsælasta Mugison eftirherma sunnan við miðbaug. 
(Boðskapurinn með þessari sögu er að sjálfsögðu þá að ef þú verður ekki á Ísafirði um páskana þá er hætta á því að þú týnist í sandsskafli(og ekki treysta úlfaldasölumönnum)).

P.S. Engir úlfaldar meiddust við gerð þessa pistils.

Crowdið maður, crowdið!

Það líður að stuði og í tilefni þess ætlum við að byrja að setja öll videoin sem Inspired by Iceland setti á netið eftir síðustu hátíð. Eins og elstu menn muna var síðasta hátíð ofboðslega mediavæn og flott eftir aðkomu margra góðra aðila, eins og Inspired by Iceland, Exton og Stuðs ehf! Auðvitað eru styrktaraðilanir fleiri og hefði ekkert gerst án þeirra en þeir eiga hérna skildi um alla síðu og forvitnast má meira um þá hér. Takk styrktaraðilar, þetta væri ekki hægt án ykkar!

Ætli það leki ekki inn eitt til 2 video á dag svona til að hita upp fyrir sullandi bullandi rokk stuð sem aðeins má finna um páska á Ísafirði. Allar nefndir eru nú að vakna og funda til að gera hlutina sem flottasta í ár.

Söluvarningnefndin er byrjuð að sjóða saman hugmyndir og hef ég líka heyrt að yfirmannaofursemégveitekkihvaðheitirsemákveðuralltsemskiptirmálitónlistarlegaséðnefndin er farin að hittast og bralla upp rokkdagskrá fyrir okkur hin. Þá er ritstjórnin einnig að vakna og byrja að pósta fjörinu. Ég hef ákveðið að vera ritstjóri aldrei.is aftur í ár og mun hann Andri einstaki verða mér innan handar með efnisskrif eins og í fyrra, en drengurinn er ansi leikinn með lyklaborðið. Ef þig langar að vera með og hefur stuð&rokk fram að færa, endilega hafðu samband við mig :)

Sjáumst á AFÉS 2012!

Myndavél fannst á AFÉS slúttinu á páskadagskvöld í Víkurbæ 2011. Ef þú átt hana eða kannast við einhvern sem tapaði myndavél þarna, endilega verið í sambandi við forsvarsmenn vefsins og kannaðu málið. Það er alltaf leiðinlegt að tapa græjunum sínum! Þetta er Samsung vél og þú þarft bara að segja okkur týpunúmer og svona smáatriði svo við getum sannfært okkur um að þú sért réttur eigandi og við sendum hana um hæl.

Rokkkveðjur,

AFÉSarar

Íslenskuneminn Patrick Doodt kom til Íslands árið 2010 til að taka þátt í íslensku námi sem fór fram á Núpi á vegum Háskólaseturs Vestfjarða. Hann hefur greinilega fallið fyrir Íslandi því 9 mánuðum síðar var hann mættur aftur, til að fara á Aldrei fór ég suður! Hann gisti meira að segja aftur á Núpi en það er orðið umrætt víða hversu gott sé að gista þar hjá "Núpsbræðrunum". Video þetta birtist á Inspired by Iceland vefnum nú rétt fyrir jólin og má sjá það hér. Ég hinsvegar fór styttri leiðina og skellti þessu beint hérna inn, endilega kíkið!

Aðstandendur Aldrei fór ég suður leggja áherslu á að fólk á öllum aldri fái notið atriðanna.

Viðtalið er fengið að láni frá kynningarriti Félags vestfirskra listamanna, List á Vestfjörðum sem var gefið út núna í haust og dreift um alla Vestfirði. Kunnum við þeim þakkir fyrir að fá að birta þetta viðtal.

Rokkhátíð alþýðunnar, Aldrei fór ég suður, var haldin á Ísafirði í áttunda sinn nú í vor, en hún hefur heldur betur fest sig í sessi í þjóðarvitundinni síðan hún hóf göngu sína. Eins og margsinnis hefur komið fram er hátíðin hugarfóstur feðganna Mugison og Mugga, sem sáu þó ekki fyrir að hún yrði árlegur viðburður þegar þeir lögðu fyrstu drögin að ísfirskri tónlistarhátíð. Á hátíðinni hefur margt fremsta og þekktasta tónlistarfólk þjóðarinnar komið fram, en jöfn áhersla hefur samt sem áður verið lögð á óþekktari listamenn, sérstaklega frá Vestfjörðum. Hvað markmið hátíðarinnar varðar hafa aðstandendur hennar aldrei farið í grafgötur með það að þeirra heitasta ósk sé að á henni ríki sullandi stuð, eins og það heitir.

Að Aldrei fór ég suður hefur frá upphafi staðið samhentur hópur fólks sem gefur vinnu sína við hátíðina. Að vanda hóf undirbúningshópurinn vinnu sína um jól og fór dagskrá hans að þéttast þegar líða fór á veturinn. Í ár var sá hátturinn hafður á að hópurinn bar sig í auknum mæli eftir aðstoð heimamanna. Sú nýbreytni gafst sérlega vel að mati aðstandenda, enda dreifðust verkefnin á fleiri hendur og nýjum þáttakendum fylgdi aukinn kraftur.

Heimasíða hátíðarinnar, www.aldrei.is, er gott dæmi um hvers vel tókst til, en Ágúst Atlason tók að sér ritstjórn hennar, auk þess að gefa henni nýtt og ferskara útlit. Ágúst og samstarfsfólk hans náðu að lífga svo hressilega upp á síðuna að fyrirtæki alls óháð hátíðinni voru farin að falast eftir því að auglýsa á síðunni, enda var umferðin um hana mjög þétt og jöfn. Eins sá sterkur hópur um undirbúning og sölu á varningi tengdum hátíðinni. Úr þeirri vinnu komu alveg nýjar stefnur í söluvarningnum og miklu meira úrval en áður hefur verið. Sami hópur sá um að skipuleggja alla dreifingu á varningnum sem og að manna sölubásinn sem var opinn alla helgina á tónleikasvæðinu. Hápunktur vinnu söluteymsisins var hins vegar tvímælalaust uppboð á lopapeysu merktri Mugison og merki hátíðarinnar, en sú seldist á áður óheyrðu verði fyrir lopapeysu.

Á hátíð sem þessari, þar sem enginn fær greitt fyrir þátttöku, skiptir höfuðmáli að gestirnir sem koma til að troða upp upplifi sig sérstaklega velkomna. Undanfarin ár hafa aðstandendur því efnt til páskaveislu fyrir popparana, þar sem Papamug hefur boðið upp á rækjukokteil í forrétt og páskasvín í aðalrétt. Sú veisla er orðin ein af vinsælustu matarveislum ársins. Til að gera enn betur við gesti sína blésu skipuleggjendur hátíðarinnar í ár til morgunverðarhlaðborðs á heimavist popparanna yfir helgina. Það mæltist svo vel fyrir að ákveðið hefur verið að hlaðborðin verði hluti af hátíðinni héðan í frá.

Að nefna framlag nokkurra sjálfboðaliða er að hætta sér út á hálan ís, því fjöldinn sem að Aldrei fór ég suður kemur, á einn eða annan hátt, er í raun óteljandi. Hátíð sem þessi gæti aldrei orðið veruleiki ef ekki væri fyrir dyggan stuðning heimamanna – sem og gesta, sem leggja leið sína vestur gagngert til þess að hjálpa til við undirbúning. Ekki eru til nógu sterk orð til þess að lýsa þakklæti okkar aðstandenda til þeirra sem leggja hönd á plóg. Ætli það sé ekki einfaldast að segja eitt stórt og gott TAKK.

Jón Þór Þorleifsson, rokkstjóri